ന്യൂഡൽഹി: അധ്യക്ഷസ്ഥാനത്തേക്ക് നിയമിതനായി മണിക്കൂറുകൾക്കുള്ളിൽ ജമ്മു കശ്മീർ കോൺഗ്രസിന്റെ പ്രചാരണ സമിതി അധ്യക്ഷ സ്ഥാനം രാജിവെച്ച് മുതിർന്ന കോൺഗ്രസ് നേതാവ് ഗുലാം നബി ആസാദ്. ആരോഗ്യപരമായ കാരണങ്ങളാലാണ് രാജിയെന്ന് രാഷ്ട്രീയ കേന്ദ്രങ്ങൾ പറയുമ്പോഴും പാർട്ടിക്കുള്ളിലെ പ്രശ്നങ്ങളാണ് രാജിയ്ക്ക് പിന്നിലെന്നാണ് ലഭിക്കുന്ന സൂചനകൾ. തീരുമാനം കോൺഗ്രസ് നേതൃത്വത്തെ അറിയിച്ചുവെന്നും അധ്യക്ഷ സ്ഥാനത്തേക്ക് തന്നെ തെരഞ്ഞെടുത്തതിൽ നന്ദി പറയുന്നുവെന്നും ഗുലാം നബി പ്രതികരിച്ചു.
അതേസമയം, പാർട്ടിയുടെ അഖിലേന്ത്യാ രാഷ്‌ട്രീയകാര്യ സമിതിയിൽ അംഗമായതിനാൽ പ്രചാരണ സമിതിയിലെ നിയമനം തന്നെ തരംതാഴ്ത്തുന്നതായി ചൂണ്ടിക്കാട്ടിയാണ് ഗുലാം നബി രാജിവെച്ചതെന്നും അഭ്യൂഹങ്ങളുണ്ട്. മുതിർന്ന നേതാവും ജമ്മു കശ്മീരിലെ മുൻ മന്ത്രിയുമായ ഗുലാം നബി ആസാദ് ഏറെ നാളായി പാർട്ടിയുമായി അഭിപ്രായ വ്യത്യാസത്തിലായിരുന്നു. രണ്ട് വർഷങ്ങൾക്ക് മുൻപ് സംഘടനാപരമായ മാറ്റങ്ങൾ ആവശ്യപ്പെട്ട് പാർട്ടി അധ്യക്ഷ സോണിയാ ഗാന്ധിക്ക് കത്തെഴുതിയ 23 നേതാക്കളുടെ സംഘത്തിൽ പ്രധാനി കൂടിയായിരുന്നു അദ്ദേഹം. അങ്ങനെയിരിക്കെ അദ്ദേഹത്തിന് പ്രചാരണ കമ്മിറ്റി അധ്യക്ഷ സ്ഥാനം നൽകിയതിനെതിരെ വിമർശനങ്ങളും ഉയരുന്നുണ്ട്.
